शेयर बजारमा सोझासाझा तथा केही मूर्ख तथा लहडी लगानीकर्ताहरुको बाहुल्यता भएको कारणले गर्दा हाम्रो शेयर बजार अत्यधिक चलायमान छ । यहाँ मूर्ख भन्नाले हल्लाको पछि लागेर आफूसंग भएको शेयर हतार हतारमा खरिद बिक्री गरी घाटा ब्यहोर्ने लगानीकर्तालाई भन्न खोजिएको हो अत: यसलाई अन्यथा नलिइयोस् । यो वर्गमा कहिलेकाहीँ आफूलाई दिग्गज ठान्ने लगानीकर्ता पनि पर्ने गरेको अनुभव छ ।
अमुक कम्पनीले त यति धेरै बोनस अथवा राईट शेयर दिने भयो भन्ने हल्ला चल्छ अनि केही नबुझेका लगानीकर्ता अरुको लहैलहैमा लागि उक्त कम्पनीको आर्थिक अवस्था, सर्वसाधारणमा जारी भएको शेयर संख्या आदि केहीको पनि विश्लेषण नगरी शेयर खरिद गर्छन् अनि दुई दिनपछि मूल्य झर्दा टाउकोमा हात राखेर आफ्नो ब्यहोरालाई होइन कि सरकार तथा नियामक निकायलाई गाली गर्न थाल्छन् ।
