भार्गव विकास बैंकले फागुन २४ देखि १००% हकप्रद सेयर निष्कासन खुला गरी सकेको छ । भार्गवले एक कित्ता बराबर थप अर्को एक कित्ता (१ः१) अनुपातमा प्रतिकित्ता १०० रुपैयाँ दरले १२ लाख कित्ता हकप्रद सेयर बिक्री खुला गरेको हो । हकप्रद सेयर निष्कासनपछि भार्गवको चुक्ता पुँजी २६ करोड ४० लाख रुपैयाँ पुग्नेछ । भागर्वले गत वर्षको नाफाबाट लगानीकर्तालाई २० प्रतिशत बोनस सेयर दिएको छ ।
तर हकप्रद भने बोनसभन्दा अघि कायम चुक्ता पुँजी १२ करोडबाटै दिएको हो । कम्पनीको यो हकप्रद सेयरमा फागुन ११ गते सम्म कायम सेयरधनीले मात्र आवेदन दिन सक्नेछन् । आवेदन दिने अन्तिम दिन चैत्र २८ गते तोकिएको छ । भार्गवको बिक्री प्रबन्धकको जिम्मेवारी एनएमबि क्यापिटलले सम्हाल्दै छ । भार्गव विकास बैंकको केन्द्रीय कार्यालय सुर्खेतरोड तथा यसका अधिकांश शाखा कार्यालयमा गएर आवेदन दिन सकिनेछ ।
यस्तै, एनएमबि क्यापिटल लिमिटेड नागपोखरी काठमाडौं तथा एनएमबि बैंकको अधिकांश शाखा कार्यालयबाट पनि आवेदन दिन सकिनेछ । एनएमबि क्यापिटल लिमिटेड नागपोखरी काठमाडौंबाट भने चेक मात्र बुझिने व्यवस्था गरिएको छ । चालु आर्थिक वर्षको दोस्रो त्रैमाससम्ममा भार्गवको चुक्ता पुँजी १४ करोड ४० लाख रुपैयाँ रहेको छ । भार्गवले यो त्रैमासमा एक करोड ८० लाख ८ हजार रुपैयाँ खुद नाफा कमाएको छ ।
Source: BhargavBikashBank
